Song (Hymn):
LORENZO RUIZ, MARTIR
1. Ang Bayang Pilipino, ngayon ay nagsasaya
Isang sugo sa langit, tayo ay mayroon na.
2. Salamat sa Maykapal, sa banal na biyaya
Tinanghal ng daigdig, kayumangging dakila.
Refrain:
Purihin ka Lorenzo at iyong mga kasama
Alagad ng Maykapal, sagisag ng pag-asa
Sa Rosaryo ng Birhen, kami'y iyong kasama
Iyo ang aming puso, Lorenzo de Manila.
3. Ipagbunyi din natin, mga kasamang martir
Sa lupa at sa langit, sila ay dadakilain.
(Repeat 2 ... Repeat Refrain)
Iyo ang aming puso, Lorenzo de Mani-la.
Download "Lorenzo Ruiz, Martir" Musical Sheet.
Prayer:
PANALANGIN PARA KAY SAN LORENZO AT MGA KASAMA
Amang Mapagmahal, ang Iyong Anak na si Hesukristo ay naghandog ng kanyang buhay para sa kaligtasan ng tanan. Kasihan kami ng iyong pag-ibig upang maihandog ang aming buhay para sa iyo at sa aming kapwa tao. Inakay rin ng mapagpala Mong kamay ang iyong mga lingkod na sina San Lorenzo Ruiz at mga kasama sa lupain ng Hapon upang tularan ang sakripisyo ni Kristo at ipamansag ang Mabuting Balita ng Kaligtasan.
Isinasamo namin na sa pamamagitan ng panalangin ng mga banal na martir na kami'y maging matatag sa pananampalataya tulad nila at maging kasangkapan ng pagpapahayag ng mabuting balita sa aming bayan at sa mga bansang nasa paligid namin. Dinggin Mo ang aming kahilingan at ang tanging biyayang aming hinihingi. (Banggitin ang mga kahilingan) Kaisa ni San Lorenzo Ruiz at mga kasama, hinihiling namin ito sa pamamagitan ni Hesukristo na aming Panginoon. Amen.
Poetry:
LORENZO RUIZ, UNA NAMING MARTIR
Lorenzo Ruiz una naming martir
Totoong kay rami ng pagtutunggali
Sa buong buhay mo
Halos di mawari, makailang ulit muntik na magapi
Ngunit nakaraos ng maluwalhati.
Pananampalataya di mo itinatwa
Nanindigan kang Kristyano sa diwa
At napatunayang kahit sa gawa
Mga naghihirap sa'yo ay namangha.
Ng ika' pinilit na iyong talikdan
Pananampalatayang iyong kinagisnan
Buong tatag man din na 'yong tinuran
Ako ay Kristyano at handang mamatay
Libu-libong buhay kung may'ron man ako
Sa Panginoong Diyos ay ihahandog ko. +
Nestor Gotis, a devotee to San Lorenzo Ruiz shares a prayer he has composed:
|
My brothers and sisters in Christ,
I have made my devotion to San Lorenzo Ruiz and wants to share my devotion to all the faithfuls in San Lorenzo Ruiz Church.
His example of faith to God is an inspiration to me to endure all kinds of pain, both in body and spirit. His memory of strength of faith is a consoling source at desperate times when my own faith to God is tested by fire of my own reason. In deep thoughts, I found that by devotion and faith to Christ and the righteousness of the saints have more reasons than my philosophical hulabaloo.
I crafted a prayer to him in Pilipino and I feel its power over my psyche. I feel my patron is hearing me and granting my prayers.
Please see then if my prayer is acceptable to the Church in SJDM and I hope this letter will be read during the mass, if it fits with the liturgical language , after reciting the Lord's Prayer, Hail Mary, Glory Be and the Apostles Creed. Thank you.
I hope this prayer will be read to persons who are inflicted with illness, may he or she is in the hospital and at home. It has a healing power.
Yours in Christ,
Bro. Nes
DEBOSYON KAY SAN LORENZO RUIZ
Sa pangalan ng Diyos Ama, at ng kanyang Anak, Panginoong HesuKristo, at Espiritu Santo, ako po ay naninikluhod sa paanan ng aking patron San Lorenzo Ruiz na dinggin ang aking panalangin at mataimtim na debosyon sa iyong katapatan sa Panginoon.
O mahal na patron San Lorenzo Ruiz, tunay kang matiisin sa hirap at mga pasakit. Bahaginan mo po ako ng iyong katatagan ng iyong pananampalataya at ng iyong pagkamatiisin sa mga pahirap at pasakit. Ikaw, O aking patron na ngayon ay naninirahan sa kaluwalhatian ng Panginoong HesusKristo, kasama ng mga santo at anghel sa kalangitan, hinihiling ko sa iyo ang iyong pagkalinga, sapagkat ako ay likas na mahina at walang kakayahang maging banal halintulad sa iyo. Tulungan mo po ako at ipinalangin mo po ako sa Diyos na ako ay mabahaginan na kanyang banal na pagpapala, at pagalingin po ako sa aking karamdaman, at ilayo ang aking mga mahal sa buhay sa lahat ng kapahamakan.
Nangungumpisal ako sa iyong espiritu at sa Panginoon na ako ay alipin ng kasalanan, subalit dahil sa iyong kabanalan, ako ay nagkaroon ng pag-asa ng kapatawaran sa aking mga sala, sapagkat ikaw ang aking tagapamagitan sa altar ng Panginoon nakapangyayari sa lahat. At dahil sa iyong katapatan at kabanalan, sa iyong dugo at sakripisyo, iwinaksi ng Panginoon Hesukristo ang timbangan ng paghuhukom sa lupa at sa kalangitan, at pinalitan ng kanyang pag-ibig, upang kanyang maalala ang aking pananampalataya at hindi ang aking mga pagkukulang.
O patron San Lorenzo Ruiz, ang iyong katapatan at kabanalan ay aking sandalan sa panahong ako ay nasa ilalim ng pagkalito at pag-aalinlangan, at pinalaya mo ang aking katawan at isipan sa pananakop ng mga masasamang pita at makayanan ang paghihirap.
O patron San Lorenzo Ruiz, bituin kang gabay sa kadiliman at gamot ka sa lahat ng karamdaman. Ako ay narito sa paanan ng iyong kabanalan. Ipinalangin mo po ako sa Panginoon, ngayon, at sa araw-araw, hanggang sa akoay papanaw, at maligtas ang aking kaluluwa sa apoy ng kapahamakan. Siya Nawa (AMEN).
|
